بسم الله الرحمن ياالله عسى خير
ياالله عسى في حكم الأقدار خيره

سلامٍ أحلى من حليب المغاتيـر
يفوح عطـره ويتناثـر عبيـره

للصاحب اللي من كبار المشاهير
يفـداه رجـالٍ حبالـه قصيـره

كريم نفس وفي لسانه تعابير
تغنيك عن قل الكلام وكثيره

شجاع مومن بالقضاء والمقادير
وإذا بطش يبطش بكفٍ قديره

حكيم راي وينقد الشور ويشير
وافي ولايقبل بظلم(ن) لغيره

حازم ومتواضع .. بوجهه تباشير
يدير عسرات المدى ماتديره

أبوعلي وجه السعد والمسافير
(جابر) عسى ربي يقاه ويجيره

نسل الرجال اللي تهز الطوابير
من فوق خيل وفوق جيش(ن) مغيره

هجوس قلبي واردات ومصاديـر
ياالله تحل المشكلات العسيره

همٍ يفوق طويق وأثقل من النير
زودٍ على جور الزمان ومصيره

لاواهنيك تفرد الريـش ياطيـر
وتحوم في ديره وتنـزل بديـره

وانا ليا ضاقت علـى المقاديـر
أشكي على الله فالعلن والسريره

وإن طالت الدعوى فلاني بلاخير
وصلت حر(ن) من حرار الجزيره

حر(ن) ينومس لاقنوه الصقاقير
يمناه في كسب الجمايل بصيره

وسلامٍ أحلى من حليب الغاتير
يفوح عطره ويتناثر عبيره