على الله وبالله ننظم القاف باستدلال=نسوي بيوت الشعر والله يسويها
على الله وبالله نوفي الوزن والمكيال=مصير الحياة الموت والله واليها
حيا الله حيل ضمر جات في الاقبال=الهجن الاصايل زين الله تحاليها
لفن ست من وادي الدواسر لهن روجال=مع منهج طير المهامل يباريها
مضن ديرة عشنا بها اجيال عقب اجيال=تبالة وسرقة والحزيم وضواحيها
مراعي الفلا ما فيه علفة ولا عمال=تذكرت الايام القديمة وماضيها
لفتنا اتباراء كنه يدلها دلال=على نية المرسل توجه نواصيها
لفتنا بعلم رجال من طيبين الفال=وصلت من عزيز غالي عند غاليها
وصلتنا الرسايل شاملة كاملة وجزال=تزف التجارب والعبر في مطاويها
هلا عد نو فيه برق وفيه خيال=يسقي الديار الضامية لين يرويها
يكسيها الزهر الورد واللون والجمال=ونبت الربيع وفايق الصيف غاشيها
هلا عد ما ثجت الينابيع والشلال=بهت وابتهج عذب المناهل وصافيها
يا طير المهامل تشتكي حال من الاحوال=يا بشراك تلقى من همومك يجليها
يا بشراك قول وفعل ماهو بقيل وقال=كما قيل راعي الاولة ما يخليها
لا تثر عليك علوم ثقال ما تنقال=تثير النعارة والتسامح يهديها
تطيب الخواطر من هل الخير والعقال=ويمرضها التنازع والتراضي يداويها
يا بو بندر العايل يردونه العيال=يردونه من ادنى علومه وقاصيها
صدوف الزمن رأس التهاويل والغربال=أتركها تخيم فوق ناس تربيها
زمان التمرد والمطامع والاستغلال=وقف ضد من يقضي اللوازم وينهيها
يعرقل مصالحنا بخيل يربي مال=اهله ناشفين وخزنته ما يزكيها
قوي على الادنين متعجرف محتال=واذا جات من الاقصين مايلتفت فيها
ما يحتس مدري لا مبالاه والا اهمال=طمى وانعمى يبغى الجمايل ويخطيها
عسى شجرة منها وفيها جنا وظلال=من اهل الحسد والكيد والشر ينجيها
زهت في ورقها والثمر والفنود جلال=وتعم بركتها كل من جاء حواليها
مشينا على خطة عوارف شيوخ ابطال=ثبوت قواعدها ثقال رواسيها
مطاليق فيهم دين راي ورشد وثقال=بنو خطة حق علينا نعلويها
طرقهم علينا غالية والدروب طوال=لو هي بالثمن ندفع ثمنها ونشريها
نتمنا لك التوفيق في الحل والترحال=علومك لفعل الخير ربي يقديها
واصلي واسلم عدد الكبار والهلال=على المصطفى حافظ الامانه ومديها