أبدا بذكر الله مخلص ومحتب=رب الملا محيي العظام الرميمة
حظي ورزقي واتكالي على الرب=اسال غفرانه وجنة نعيمه
سر يا نديبي فوق هجنن مدرب=ولد اشعل لاحة عليه الوسيمة
ياسعد ركاب لكوره تقرب=يقطع مسافات الدروب القديمة
فوقه شداده والرسن والمضرب=ويجري على صم العظام السليمة
ماهو بمن صنع الحديد المسكرب=عليه من صنع الخواجة لزيمة
سواقها يطلب وفكره تشعب=الكمبيالة والطرق والقسيمة
الابل عطايا الله فيد ومكسب=تنحب يا مال السعد والغنيمة
اقدم على عبود رجل مهذب=واقلط على ترحيبته والعزيمة
رجال يفرح بالمسير ويرغب=ويحط في قصر الضيافة وليمة
من داعية قحطان قيف معرب=اهل الكرم واهل الشجاعة وشيمة
رجالهم مضمون مايلحقه سب=مواقفه بين القبايل عظيمة
حرابهم قدامه النار تشتب=وتسوقه امواج البحور الهميمة
بين اليمن والشام والشرق والغرب=تاريخهم له بالكتب ذات قيمة
بعد الثقة والعرف والزاد والشرب=تبقى العلاقة والثقة مستديمة
سلم عليه اعداد مايفطر الحب=وعداد نفناف الربيع ونسيمة
سلام عدة مايصب المطر صب=ون حث رعاده تزايد رزيمه
تلقاه في الدنيا عروف مجرب=ويسد ما بين الخصيم وخصيمه
قله يسد المشكلة قبل تصعب=وتخلي العاقل بين زغيمه
ان كان مايبغى القبايل تناشب=ينهي علوم عاقبتها وخيمة
ولا يطاوع راعي الغش الكذب=اللي يحاول تستطيل الجريمة
مادمت مرجعنا ادارة ومنصب=مفروض ما ترضى لنا بالهزيمة
سر بالنظام وخل غيره على جنب=واترك مجال الشايعات الوهيمة
امر على ايدك نفذه لا تزرب=ولا توليه اليدين الاثيمة
امر من الدولة يحرب الخطأ حرب=ويرد راعي الغطرسة والظليمة
وصلاة ربي عد نود يلا هب=على نبي سنته مستقيمة